難忘18歲開演唱會 夜晚海旁跑步舒壓 郭曉妍想學烘焙整「三分甜」
從18歲踏上演唱會舞台，到夜晚海旁跑步釋放壓力，郭曉妍總能在忙碌的生活中找到自己的節奏。她認為「努力的人是不會一無所有的！」壓力大時就靠音樂和跑步調整心態，對於生活，她更希望學會烘焙，為自己和身邊人添加「三分甜」。未來的她目標明確，不僅是追求個人成長，更希望挑戰更多國際跑步賽事，跑出屬於自己的世界舞台！
你的MBTI是什麼？
INFJ，入行之後我由一個P人變成「100%J人」。因為自己每日既schedule都係密密麻麻，除咗工作之外仲有讀書同訓練時間需要安排好，所以喺計劃自己時間方面會係好有planning，而且望住每日嘅工作逐樣完成，會好有滿足感！
最自豪的經歷？
最自豪係18歲嘅時候，我地開咗兩場《Lolly Talk Little Things Concert》，呢個經歷幫我成長嘅見證立下咗一個里程碑。當踏上舞台嘅時候，我會好自豪，因為我身邊有大家嘅出現，可以同姊妹一齊用我哋嘅作品同音樂，帶到快樂同Energy俾大家。
壓力大的時候，會如何調整心態？
我會夜晚落街喺海旁跑步，一路跑一路俾自己專注嘅時間。我覺得當未控制到其他嘢嘅時候，唯一可以控制嘅就係我嘅身體，去堅持、去踏出每一步，原來終點就會係眼前。跑完夜大汗淋漓之後嘅快感會比我覺得我冇嘢係做唔到！
工作之外的心靈寄託？
拉小提琴同彈古箏！呢兩樣樂器都係由小學開始學起，陪伴咗我好耐嘅朋友，沉浸係音樂裏面會令我拋開所有雜念！
如果瞬間學會一門新技能，最想學？
烘焙。發現自己實在係太鍾意食甜野。我希望可以喺唔整爆個廚房之下，俾身邊嘅人同埋自己生活嘅「三分甜」。
想同5年後的自己說什麼？
25歲嘅我請繼續追求當下自己想做嘅目標！對生活保持熱愛，享受當下，成為一個更加堅強自信成功嘅人！
座右銘是什麼？
「努力的人是不會一無所有的」
沿途望出車外，是盛放的花朵（笑）
途中嘅失敗同成功都會係我嘅成長養分！
未來有什麼目標？
自從上次去咗台北跑10km，就好想再次挑戰自己。所以嚟緊會keep住參加跑步比賽，希望可以跑出國際去唔同城市參加跑步比賽，感受唔同城市嘅跑步氣氛。
Tag
郭曉妍
圖片來源：IG @yokhyo_
