【 張晨 】《有啲人， 永遠同你有兩秒距離 》

有啲人，永遠同你有兩秒距離

既然人類有喜怒哀樂，
上天自然會為你製造某種角色，去將你嘅情緒發揮到淋漓盡致。

而嗰種角色，有個特點　—　永遠同你有兩秒距離。

咩叫做兩秒距離，以運輸署嘅準則，就係一個「安全距離」。
再文雅啲，就係「你望到佢，但掂唔到。」

好多時，人與人之間彷彿都有種牽引。
而有一種牽引，係永遠拉到好近，直至你捉到對方之前，就停頓。

明明覺得好有緣分、明明覺得就快達陣，但就係差嗰兩秒。你有時會放棄，唔再搵呢個人，唔再做主動。
OK！慢慢忘記佢。
你難得地灑脫。

可惜，正當你接近完全忘記，將「兩秒距離」變成「二百秒距離」嘅時候，
上天又創造一條繞道，令你再次緊貼佢嘅車背。

更灰心嘅係，你哋都唔係有心要搵對方，可能只係工作上咁啱遇到、又或者於朋友間穿梭時恰巧撞上，總之你哋嘅關係，又出現一種「可以進一步」嘅假象。

當然，歷史又再重演。你哋始終唔可以走埋一齊，原因有好多，例如你遇返佢嘅時候，佢已經有另一個；到佢需要你嘅時候，可能你又準備緊忘記佢。

捉錯用神、陰差陽錯。

老死阿強都有過咁嘅經歷，有個女仔都不斷喺佢生命中穿梭，
但中間其實有十年雙方冇傾過半句計。

只係每隔一兩年，阿強又會喺唔同場合遇到佢。
每一次，阿強都諗住過去打聲招呼，每次都失敗收場。

有一次，係佢覺得自己著得太Hea，唔想畀佢見到，主動迴避；
有一次，係雙方身邊都有一大班朋友，走過去略嚴面懵；
有一次，佢真係追上去，由十米到五米到兩米，再到兩步…
淨返兩步，阿強停步。

唔知點開口、唔知開口之後又可以點，或者佢只係承受唔到一個風險　—
「都咁多年，或者佢已經唔記得我。」

兩步距離，阿強保持一個最安全嘅關係步數，選擇放棄。反正沒有結果，
你記得我就夠。

應該咁講，我覺得你仲記得我就夠。