老豆老母傳心師

【藍橘子】如果呢個世界上有「 老豆老母傳心師 」就好了

名牌手袋配飾

【藍橘子】如果呢個世界上有「 老豆老母傳心師 」就好了

Text:藍橘子 | Photo:電視劇截圖、電影截圖、Youtube截圖 | Edit-希彤

部分內容由博客提供及授權轉載,不代表本刊立場!

如果呢個世界上真係有「動物傳心師」,人類可以同動物溝通。
我都好想有一個「老豆老母傳心師」,可以畀我知道屋企人諗乜,可以順利表達心意地溝通…

以前細細個,連返學去過幾多次廁所都會同屋企人講。
唔知由幾時開始,總覺得父母好囉嗦,每同佢哋講一句,就會還番十句意見畀我。

到我畢業出嚟做嘢,同父母傾偈嘅時間就愈來愈少。
每次嘅交談內容,總係圍繞住幾樣嘢…

「賺咁多錢,幾時畀多啲家用?」
「淨係識得駁嘴,點解你咁不孝,小心畀雷劈!」
「我養你咁多年,你就要有責任養番我。」

有頭毛邊個想做瘌痢,試問有邊個想做不孝子?

我都好想做一個孝順仔啊,但我成日都覺得,如果我盲目順從,將自己心底裡嘅意見屈喺心入面,
扮演一個乖乖仔…

唔通呢種真係「孝順」咩?
正因為佢哋係我父母,我更想將心入面嗰句講出嚟,我希望要一個平等討論,而唔係用父母身份壓制…

每日放工返到屋企,就會急急腳走入房,連眼神接觸都覺得尷尬。

即使係同一張枱食飯,父母望住電視,我望住部ipad。我睇美劇,佢哋睇TVB,連娛樂話題都唔一樣。

仲有一樣禁忌相信大家都知道,就係千祈唔好同父母討論政治!當父母睇住新聞,見到班示威者被
警察毆打,而拍手叫好話呢班年輕人「抵死!哈哈!打多幾棍啦!」

父母表達意見,並唔係想你討論,佢哋只想你認同佢。只要你唔認同,你就係唔尊重、唔見慣世面。

如果有一個老豆老母傳心師,可以幫我了解父母想法,你話幾好呢?
好似傳心師咁講,改變自己粒子形態,變成一排粒子,父母就即時接收到我嘅想法。

其實我知道,父母係真心對我好,亦好錫我,只係表達方式用錯咗。
我亦好想做一個孝順仔,可以同父母食飯時暢所欲言,而唔係一開口就鬧交…

如果有人仲係覺得「父母生你出嚟咁辛苦養大你!你就有責任要報答父母!唔可以逆佢意!」

我覺得呢種想法好唔尊重「父母」兩個字,因為呢種只係極權統治奴隸嘅手法。

你可能也喜歡

Recommended