同居真係好痛苦
擁有屬於兩個人嘅二人世界，一齊佈置浪漫嘅小天地。
唔使再道別，日日都見住，同居彷彿令大家再次踏入熱戀期，隨時擁吻，甜蜜得很。
可惜，同熱戀期一樣，熱情會冷卻，過後就會剩低沒完沒了嘅爭吵。
同居，會變得痛苦，變成對雙方嘅折磨⋯⋯
Text, Iamge: 莎比亞
「不如我哋一齊住吖？」簡單一句，令當時開始踏出社會，有穩定收入嘅我哋，展開同居生活，搵咗一間六千幾蚊租嘅小單位。
女朋友好興奮咁將屋企嘅寶物：手袋、衫、鞋、耳環⋯⋯超過一千件物品搬嚟展覽。
而我就負責組裝傢私，身水身汗，女朋友即刻拎相機出嚟：「呢個係我見過你最Man嘅時候呀！」
一件一件大大小小嘅傢俱、兩個人嘅私人物品、玫瑰花圖案嘅窗簾布、廚房嘅碗碗碟碟⋯⋯終於都搞掂！兩個人即時攤咗喺床：「好攰呀⋯」
但唔使幾秒又望住對方：「呢個就係我哋嘅屋企喇⋯」
每晚攬住一齊瞓、每朝一齊食早餐、放工即刻番屋企一齊睇戲食飯，生活簡單但好新鮮。
女朋友話眼瞓，我會抱佢落床；當我做嘢做到攰，佢會幫我按摩。
每晚關上燈，凌黑中我哋會有時講心事、有時佢要我講故事、有時粒聲都唔出，拖住手直至瞓著。
漸漸地，一切嘅甜蜜都被爭吵取代。
佢話我：「你啲紙巾可唔可以唔好成日亂扔。」
我話佢：「小小事唔好咁煩得唔得，番完成日工唔係仲要受妳氣呀！」
輪到我會話：「妳啲鞋著完一對執番一對得唔得，門口已經成堆妳嘅鞋喇⋯⋯」
佢冇解釋，只係指住嗰堆「我尋晚話太攰，所以聽日洗」嘅碗碟。
