原來咁樣做 就畀到驚喜女友

網誌

男朋友最苦惱,就係女朋友成日想要驚喜。

頭一兩次都話容易,之後每次送禮物都只係有驚無喜。

女朋友仲會間唔中話:「唉,你好耐冇氹過我開心喇⋯⋯」

真係唔知點算好。

時間耐咗,女朋友會愈嚟愈期待更多深刻嘅驚喜,而男朋友只會愈嚟愈懶,或者啲方法都用一次就少一次⋯⋯真係Mission Impossible。

正當我苦惱之際,女朋友突然同我講:「想畀驚喜我好簡單㗎咋,只要你咁做就得⋯⋯」

冇錯,女朋友的確好希望可以成日有大龍鳳令佢開心,但佢好明白我哋兩個唔係愛情電影入面嘅女主角,佢都唔會要求我好似《Fifty shades of grey》男主角咁突然揸架直升機帶佢飛上天,佢其實只係想「你間中嚟接下我放工已經好開心㗎喇!」

佢並唔係人大咗,要求都低咗,而係佢明白你願意付出少少心思,佢都要學懂欣賞。愛情愈耐愈難走,知足好重要。

所謂「驚喜」,意思唔係要史詩式嘅浪漫,而係喺平淡嘅生活中,點綴一下甜蜜。

突然買佢鍾意食嘅蛋糕,突然買支花,突然買對耳環畀佢⋯⋯通通都夠佢開心幾日,同自己講「真係好幸福!」

但我係一個蠢男友,好多時都太被動,要佢踢一腳我先識做番少少嘢,佢就會覺得:「要我講先做,冇乜意思!」所以,如果驚喜係由你主動送上,嗰份開心起碼多50%!

對女朋友嚟講,你嘅「驚喜」係一份肯定,令佢充滿安全感,因為你仍願意為佢付出,佢都值得你為佢做番啲嘢。

不過,每個女朋友都期待一份最大嘅驚喜,就係你會突然之間,跪低喺佢面前,講一段感人嘅求婚宣言,然後佢感動到喊住咁話:「我願意。」

呢份歷盡艱酸,苦盡甘來嘅甜蜜,佢每日都諗住、努力咁去實現。

你可能也喜歡

Recommended