估唔到咁都可以 令女朋友開心 莎比亞

網誌

「我份人好簡單㗎咋~你好易就氹到我開心。」

女朋友成日都咁講,但實情明明係要搞啲大龍鳳,送啲整幾日幾夜嘅禮物畀佢,佢先會話:「唉~算你啦!」

所以,我今次鼓起勇氣挑戰佢,同佢講:「夠喇!唔好再話易呀!氹你一啲都唔易!」

佢好冷靜咁答我:「哦⋯咁你想點吖?」

我即刻話:「如果係咁易,妳記錄低吖!點樣可以令妳簡單咁開心!」

然後,佢竟然記低啲咁嘅嘢⋯⋯

第一日。

女朋友寫咗一句:「點呀妳,做嘢辛唔辛苦?」

我:「即係點?」

女朋友解釋:「呢樣係第一樣,有時你無啦啦關心我,我都會好開心。」

我:「吓⋯好小事咋喎⋯⋯」

佢:「你有時會成日都冇理我⋯⋯」

我:「所以⋯我應該唔理妳一陣,之後再關心番妳,就奸計得逞啦!」

到第二樣,係選擇題。

女朋友成日問我,邊個邊個女明星/女神 定佢靚啲,我梗係答女朋友啦。

我問:「咁都開心?我一定係咁答㗎喎~唔通我會咁蠢讚其他女仔咩!」

佢:「雖然係咁,但我都會鍾意,快啲講,我靚唔靚?」

我:「靚⋯⋯」

佢:「我係邊個?」

我:「我最靚嘅女朋友⋯⋯」

佢:「錯!叫我女神。」

我:「係⋯⋯女神⋯⋯我最愛嘅女神!」

佢:「嗯!咁就乖喇,以後唔使我提,都要識咁答呀!」

到咗第三樣,呢樣可能特別少少,女朋友有啲怕羞咁喺我耳邊講:「有時行緊街,你主動攬住我條腰,我都會覺得好窩心,好似有人保護自己咁。」

我突然好醒目咁講:「哦!咁以後我做齊呢啲嘢就得啦!好容易啫,係咪我咁做,你就唔會再發脾氣?」

女朋友當然唔會咁易畀我過骨:「呢啲只係基本咋!」

每個女朋友都有驚人嘅想像力,可以將一件好普通嘅事亂諗到好複雜,亦都可以將好簡單嘅舉動,視為滿滿嘅幸福。

氹下佢,令佢笑下,原來好易。

你可能也喜歡

Recommended